’آپ کا کیمرا، آپ کا سرکس‘ شان شاہد کا ٹک ٹاکرز کی شوبز میں آمد پر سخت ردعمل

 پاکستانی اداکار، ہدایت کار اور مصنف شان شاہد نے سوشل میڈیا شخصیات کی مین اسٹریم شوبز میں بڑھتی ہوئی آمد پر سوالات اٹھاتے ہوئے کہا ہے کہ سوشل میڈیا پر ملنے والی فوری شہرت لازماً طویل اور پائیدار فنّی کیریئر میں تبدیل نہیں ہوتی دنیا ڈیجیٹل کے پروگرام ’دی اینکر مین‘ میں علی سہیل کو دیے گئے حالیہ پوڈکاسٹ انٹرویو میں شان شاہد نے پاکستان کی بدلتی ہوئی انٹرٹینمنٹ انڈسٹری پر گفتگو کی، جہاں ٹک ٹاکرز، یوٹیوبرز، انفلوئنسرز اور دیگر ڈیجیٹل کریئیٹرز سوشل میڈیا سے ٹیلی ویژن اور فلموں کی دنیا میں قدم رکھ رہے ہیں۔ شان شاہد نے کہا کہ وہ یہ فیصلہ نہیں کرسکتے کہ فلم یا ٹی وی کے منصوبوں میں کسے کاسٹ کیا جائے، کیونکہ ہر شخص کو اپنے پیشہ ورانہ فیصلے کرنے کی آزادی حاصل ہے، تاہم انہوں نے سوال اٹھایا کہ کیا اچانک ملنے والی آن لائن شہرت اداکاری اور انٹرٹینمنٹ میں پائیدار کیریئر کی بنیاد بن سکتی ہے؟سوشل میڈیا اور روایتی شوبز کے درمیان بڑھتے ہوئے امتزاج پر بات کرتے ہوئے شان شاہد نے دوٹوک انداز اپنایا اور کہا، ’آپ کا کیمرا، آپ کا سرکس‘۔ انہوں نے کہا کہ لوگ جو چاہیں کرسکتے ہیں کیونکہ انہیں دوسروں کے فیصلوں پر اختیار حاصل نہیں، تاہم ان کے مطابق صرف مقبولیت کو فنّی مہارت سمجھنا درست نہیں۔ شان شاہد نے کہا کہ سوشل میڈیا پر بننے والی مقبولیت فوری طور پر کسی کو توجہ اور مواقع فراہم کرسکتی ہے، لیکن طویل عرصے تک متعلقہ رہنے کے لیے فن کی سمجھ، تربیت اور مہارت ضروری ہے۔ ان کا کہنا تھا کہ اگر کوئی شخص فن سیکھے بغیر کامیاب ہوجائے تو ایک وقت ایسا بھی آسکتا ہے جب وہ خود سے سوال کرے کہ اس کا کیریئر صرف ایک یا چند سال تک ہی کیوں چل سکا۔ شان شاہد نے وائرل ہونے والی کسی ویڈیو یا اچانک بڑھنے والے فالوورز اور حقیقی فنّی کیریئر کے درمیان فرق پر زور دیا۔ انہوں نے پاکستان کی فنّی تاریخ کے معروف گلوکاروں مہدی حسن اور نور جہاں کی مثال دیتے ہوئے کہا کہ کئی دہائیاں گزرنے کے باوجود آج بھی لوگ ان کا موسیقی کا فن سنتے ہیں۔شان شاہد کے مطابق ان فنکاروں کی مقبولیت کے پیچھے موسیقی کی باقاعدہ سمجھ اور تربیت شامل تھی۔ انہوں نے سُر اور راگ سمیت موسیقی کے بنیادی اصولوں کے علم کی اہمیت اجاگر کرتے ہوئے کہا کہ فن سیکھنا محض سوشل میڈیا پر مقبول ہونے سے کہیں زیادہ اہم ہے